Oral Histories of Older Gay Men in Hong Kong
最新书摘：
-
zitsunari2017-04-07嘩，廣州幾多呀，仲多過香港呀！廣州文化公園，嘩，嗰次嗰個嘢話，喂，去廣州囖，哎呀，我提起廣州都驚……「去啦，而家唔同啦，開放咗。」裏面有電影院呀，又有玩雜技畀人睇呀，又有做木頭公仔呀，又歌唱呀，即係裏面有好多嘢睇囖，嗰陣時兩毫子入場，好平。企埋去呀，嘩，傻佬都畀你嚇死呀，嘩，啲前後左右，氹氹轉圍住，我話癡線啦咁多人，嚇到我走呀，走唔郁呀！嘩，後尾電影院可以點呢，嘩，電影院嗰度仲得人驚呀……搞到亂晒籠。佢呢，好早就收，十點幾，一收咗之後，仲有邊度玩呀？「跟住嚟呀，仲有嘢玩㗎！」我話：吓，仲有咩，又冇燈又冇盛，黑炆炆。咁出去海皮嗰度，有個花園，剩係地下就尿廁，大便就樓上。佢話入去啦，我話死啦，裏面得盞燈膽，黑炆炆，大佬，入去咩料呀，佢話入去啦好多嘢睇㗎，我話好啦。我一入去就退返出來，佢話做咩事呀，我話裏面冇位企呀！（笑）嘩，裏面咩都有，啲友喺到吹啦，打牌啦，嘩，喺度洗啦，咩都有，嘩，喺個燈膽下，嚇得我吖！（笑）
-
zitsunari2017-04-07地主仔好慘，食又食唔飽，畀人批鬥，一陣叫你做咩嘢又做。求個自由囖，我嚟香港冇求發達，求個自由囖。嗰陣時好唔自由，咩自由都冇。呢個圈呢，我呢幾年，我係識好多人，大家傾下偈，嘻嘻哈哈，我好開心。傾來傾去，八來八去。
-
zitsunari2017-04-07我姪仔就係，佢二十一、二歲已經come out……我哋周遭任何一個家庭member，喺佢面前仍然對佢好好，有講有笑，但私底下，竊竊私語。話佢基佬……唔係好尊重佢，同埋唔係好尊重啲基嘅人。我哋中國人社會，一個爛玩嘅人好過基佬，雖然可能唔係，但係個心會覺得爛玩始終係爛玩，基佬係變態。當然，我哋唔覺得自己係變態，但係佢哋覺得我哋係變態。我認為呢啲係人性嚟嘅，即係話，我情願同你一齊去玩，好過你呃我。因為我知道人性，我唔可以呃自己。
-
zitsunari2017-04-07我條命做親都係做大公司，唔做細間㗎。我講明㗎，中環區，最多去到灣仔、銅鑼灣。九龍呢，一係尖沙咀，其他唔好頂我。觀塘區我唔做㗎，我都唔係嗰啲class，我點去嗰度啫，傻㗎！感情事呢，我鍾意零沽，唔鍾意批發。玩完之後，一出嚟就你有你去沖涼，我有我去沖涼，跟住又玩過第二件。死纏住有意思咩？得閒打電話？嘥氣啦，打比你都奇。我教人唔好攞電話，佢畀你，你都唔好開心，未必一定搵到佢。我哋經過咁多風浪就知啫，而家小朋友就唔知啲，郁吓就情情答答。我無法子，我咁大個人未試過喊得咁厲害，佢一轉身，我啲眼淚就標晒出嚟。返到家裏就成個呆咗。嗰時住灣仔，菲林明道一間舊屋。唔敢話畀阿媽聽，揸住飯碗又食唔到，打電話又搵佢唔到。幾個月都失魂落魄……你話我聽「我玩厭咗嘞，要換第二個」，我即刻成全你，做乜要拖拖拉拉，令我咁辛苦。有日喺屋企洗衫，成個人跌咗落地，終於醒咗，我對自己講，冇理由咁蠢㗎，冇理由咁蠢！所以從此之後我唔會再放感情落去。痛得好緊要。嗰時啲信用手寫，而家電腦打字根本睇唔到字跡。以前唔同，有誠有信。你可以呃盡天下人，但呃唔到自己。最後審判嗰陣時點㗎？……上帝冇問你做過乜嘢大事喎，佢只問你愛過幾多人？咁我咪話愛過千五個男人囖。我哋落地獄呢，唔使驚，大把人……我哋第十九層，最低嗰層有腳打麻雀。帝女花裏面都有話：「不認不認還須認」。你使乜扮嘢啫，係咪呀？
-
zitsunari2017-04-01在一九九一年男同性行為非刑事化之后，香港專屬同志的消費場所（如酒吧、的士高、卡拉OK、浴室、桑拿、美容中心、理髮店、精品店、咖啡店以及書店），快速興起。同志空間和粉紅經濟成功地擴大版圖，孕育了「良好消費公民」的新同志形象，與傳統的「變態」形象大不相同，并為同志提供重要的、正面的文化歸屬感。此種新興同志身份與消費密切相關，有著國際化的視野，受商業利益驅動，著重消費，並且被視為是一種「全球同志身份」的衍生。然而，它不但沒有提倡團結與身份認同，反而將那些無法達到這種理想條件的人與那些符合其條件者加以區隔。因此新興的同志世界比先前的同志環境更為隔離且更少包容性，依照階級、年齡、性別、性、種族以及身體類型而運作。……新的同性戀規範不僅是擁護及鞏固一種私有化的家庭生活，及鼓吹消費的、非政治化的同志文化，也創造了一種同志身份與空間的階層。
-
zitsunari2017-04-07你識到個朋友，你啱心水，我又鍾意佢，佢又鍾意我，真係好開心。好似我識到我契仔，識咗十幾年，嗰陣時覺得好開心。識咗嗰個幾十年嘅朋友，亦好開心。佢又對我好，其實我都冇咩對佢好，主要係佢對我好，真係好開心，被人愛真係好。